Afsláttarsamningur ríkisins um flugsæti innanlands hefur verið framlengdur til ársloka 2016
Allar opinberar stofnanir og aðilar að rammasamningskerfi Ríkiskaupa njóta að lágmarki 17% afsláttar af fullum verðum (“Forgangur”) sé greitt með Flugkorti Flugfélags Íslands.
Stofnanir sem eiga veruleg viðskipti við Flugfélag Íslands njóta síðan enn betri kjara, í samræmi við veltu, samkvæmt eftirfarandi töflu:
Nettó heildarvelta á ári | |
15 milljónir og meira | 25% |
10 – 15 milljónir | 22% |
Minna en 10 milljónir | 17% |
Ríkiskaup telja núverandi fyrirkomulag hagstætt kaupendum og notendum hjá ríkinu.
Á fundi Ríkiskaupa (RK) og Flugfélags Íslands (FÍ) í nóvember síðastliðnum lögðu RK til nokkrar úrbætur/breytingar á samningnum við FÍ. Má þar helst nefna vildarpunkta sem handhafar flugmiða fá við kaup ríkisins á flugfargjöldum með FÍ. Núverandi samningur kveður á um fyrirkomulag varðandi vildarpunkta og er það breytilegt eftir verði flugmiða.
Hjá fjármála- og efnahagsráðuneytinu og kaupendum almennt hefur á undanförnum misserum verið sífellt aukin áhersla á það, að hvorki sé tilhlýðilegt né sanngjarnt að fríðindi sem þessi renni til farþega.
Það er vilji kaupenda að afnema vildarpunkta við kaup ríkisins á flugmiðum.
Ríkið hefur einnig skoðað þann kost að koma upp miðlægri bókun á flugfargjöldum ríkisins, innanlands og utan. Gangi þetta eftir gæti einn aðili hjá ríkinu, þ.e. ein kennitala séð um allar bókanir innanlands. Með því mætti líta á slík innkaup sem innkaup eins kaupanda sem hefur áhrif á magnafslátt á flugmiðagjöldum.
Á fundi RK og FÍ í árslok 2015 voru ofantalin atriði rædd og er það vilji RK að þau verði tekin til skoðunar fyrir næsta samning um kjör á flugsætum og þá með hvaða hætti sé hagstæðast að koma þeim í framkvæmd.