Nýr samningur tók gildi 12. júní 2019 og gildir í tvö ár. Samningurinn gildir nú til 13.6.2021.

Rammasamningur þessi tekur til kaupa á almennum matvælum öðrum en fiski og kjöti, s.s þurrvöru, drykkjarvöru, frystivöru, niðursuðuvöru og ferskvöru. Samningnum er skipt í 16 hluta/flokka og eitt eða fleiri USPSC flokkar og undirflokka (class):

Um kaup í rammasamningi

Kaupandi skal kaupa inn í rammasamningi annað hvort: 

• a. Með beinum kaupum á þeim kjörum og skilmálum sem eru skilgreindir í rammasamningnum. Við bein kaup í rammasamningi skulu kaupendur gera samanburð á samningsbundnum kjörum, fyrirliggjandi vörum og verði seljenda ofl.
• b. Bjóða skal út með örútboði innan rammasamnings milli þeirra rammasamninghafa sem efnt geta samninginn.

Kaupendur áskilja sér rétt til þess á samningstíma að kaupa þær vörur og það magn sem endurspeglar þarfir þeirra og óskir á hverjum tíma. Eftirfarandi valforsendu, ein eða fleiri, sem kaupendur geta sett fram eru:

• Fast verð eða hámarksverð, kílóverð eða einingaverð (0-100%)
• Magn (0-100%)
• Innihaldsefni (0-100%)
• Hollustu merkingar (0-100%) 
• Vistferill (0-100%)
• Lífrænt vottað(0-100%)
• Þjónustugeta (0-100%)
• Viðbragðstími (0-100%)
• Afgreiðslutími (0-100%)
• Afhending (0-100%)
• Sendingarkostnaður (0-100%)
• Hraðþjónusta (0-100%)
• Umhverfisskilyrði (0-100%)
• Sérþekking (0-100%)
• Lagerstaða (0-100%)
• Kolefnisspor (0-100%)
• Pakkningastærð (0-100%)

Um framkvæmd örútboða

 Örútboð er innkaupaferli þar sem kaupandi leitar, með hæfilegum fyrirvara skriflegra tilboða meðal tiltekinna rammasamningshafa um skilmála sem ekki hefur verið mælt fyrir um í viðkomandi rammasamningi og lýkur jafnan með samningi við þann bjóðanda sem leggur fram besta tilboðið á grundvelli þeirra valforsendna sem fram koma í útboðsskilmálum rammasamningsins.

Ef skilmálar rammasamnings eru ákveðnir er heimilt að gera einstaka samninga við rammasamningshafa í samræmi við ákvæði rammasamnings. Ef skilmálar rammasamnings eru að einhverju leyti óákveðnir skal fara fram örútboð milli rammasamningshafa, eftir atvikum eftir að skilmálar eða tæknilegar kröfur hafa verið skýrðar nánar, allt í samræmi við eftirfarandi reglur:

a. Við gerð hvers einstaks samnings skal kaupandi ráðfæra sig skriflega við þá rammasamningshafa sem efnt gætu samninginn.

b. Kaupandi skal ákveða tilboðsfrest sem er nægilega langur til að rammasamningshafar geti gert tilboð vegna þess samnings sem um ræðir. Við mat á lengd frests skal taka tillit til hversu flókið efni samningsins er svo og sendingartíma.

c. Tilboð rammasamningshafa skulu vera skrifleg og skulu ekki opnuð fyrr en tilboðsfrestur hefur runnið út.

d. Kaupandi skal velja á milli tilboða rammasamningshafa á grundvelli valforsendna sem fram hafa komið í skilmálum rammasamnings.

Umhverfisskilyrði og umhverfisvottun

Að undanförnu hefur verið lögð aukin áhersla á vistvæn innkaup enda snúast vistvæn innkaup um: "að velja þá vöru eða þjónustu sem er síður skaðleg umhverfinu eða heilsu manna og ber sama eða lægri líftímakostnað samanborið við aðrar vörur og þjónustu sem uppfylla sömu þörf." Hugtakið vistvæn skilyrði notað sem yfirhugtak skilyrða sem taka tillit til matvælavottana, umhverfisskilyrða, gæðakrafna og annarra þátta sem skaða ekki umhverfi eða heilsu manna. Í innkaupum er m.a. stuðst við viðmið umhverfisskilyrða og gátlista eða sambærilegt. Lög og stefnur íslenska ríkisins undanfarin ár endurspegla aukna áherslu á vistvæn opinber innkaup. Í innkaupastefnu ríkisins segir m.a. að við innkaup skuli tekið tillit til umhverfissjónarmiða jafnt sem kostnaðar og gæða. Þetta er einnig undirstrikað í lögum um opinber innkaup og stefnumörkun stjórnvalda um sjálfbæra þróun í íslensku samfélagi. Komi í ljós á samningstímanum að framleiðsla boðinnar vöru eða framkvæmd boðinnar þjónustu veldur umhverfisspjöllum áskilur kaupandi sér rétt til að rifta samningi án fyrirvara.

Þeir seljendur sem bjóða lífrænt framleidda vöru hafa skuldbundið sig til að uppfylla lágmarksskilyrði grunnviðmiðanna. 

Innkaupastefna matvæla fyrir Ríkisaðila

Hægt er að kynna sér matvælastefnu fyrir Ríkísaðila hér   Matvælastefna Ríkisaðila