Upplýsingar um sölu notaðra eigna ríkisins

Ríkiskaup annast sölu ýmissa eigna ríkisins, s.s. fasteignir, notaða bíla og tæki. Almenningi gefst kostur á að kaupa þessar eignir ásamt ýmsum öðrum munum sem ekki er lengur þörf fyrir.

Reglulega eru haldin uppboð á bílum og öðrum farartækjum í eigu ríkisins. Uppboðin fara fram á lóð Ríkiskaupa við Steintún ( ekið um undirgöng ) og eru þar til sýnis þau ökutæki sem til sölu eru hverju sinni. Bílauppboðin eru auglýst á heimasíðu Ríkiskaupa og í fjölmiðlum.

Reglur um frágang og útfyllingu kauptilboða við sölu eigna hjá Ríkiskaupum:

1. Bjóðandi/tilboðsgjafi skal tilgreina fullt nafn, kennitölu og lögheimili svo og vinnusíma, heimasíma og/eða farsíma eftir atvikum.                                           
2. Kaupverð skal tilgreint í tölustöfum. Við sölu fasteigna skal greiðslutilhögun útborgunar í peningum skv. lið A fyllt út (þ.e. fjárhæð greiðslu og greiðsludagur) svo og liður C um greiðslur með ÍLS veðbréfum ef við á.                    
3. Seljandi lánar ekki hluta kaupverðs hins selda heldur fjármagnar bjóðandi kaupverðið með eigin fé og/eða fyrirgreiðslu frá lánastofnunum.                                
4. Kauptilboð skal dagsett og undirritað af bjóðanda og vottað af tveimur vitundarvottum. Við gerð tilboðs í bifreiðar þarf ekki vitundarvotta.
5. Áskilinn er réttur til að hafna tilboðum sem ekki eru frágengin með ofangreindum hætti.
6. Einnig er áskilinn réttur til að hafna tilboðum sem ekki teljast viðunandi af öðrum ástæðum.