Fréttalisti
Kærunefnd hafnar kröfu Olíuverzlunar Íslands um stöðvun á samningi
Olís fór fram á stöðvun á samningi um kaup á eldsneyti og olíu fyrir skip og flugvélar
Í kæru sinni til Kærunefndar útboðsmála, fór Olíuverzlun Íslands fram á stöðvun á samningi um kaup á eldsneyti og olíu fyrir skip og flugvélar. Kærunefnd hafnaði þeirri kröfu í úrskurði sínum þann dags. 16. júní sl.
Í kjölfar útboðs hjá Ríkiskaupum var samið við N1 og Skeljung og hefur samningurinn þegar tekið gildi.
Eitt af þeim málum sem greindi á um í kæru Olís var krafa Ríkiskaupa í útboðsgögnum um að verðlistar skyldu vera “almennir og opinberir”. Kærunefndin komst að þeirri niðurstöðu að þetta orðalag væri óskýrt og byði upp á mismunandi túlkun aðila á því í hverju það felst.
Ríkiskaup munu eftirleiðis gera skýra kröfu til allra bjóðenda um hvernig verðlistar skulu birtir eða vera með öðru móti aðgengilegir fyrir kaupendur. Auðvelt aðgengi að verðlistum bjóðenda í rammasamningum gerir kaupendum kleift að fylgjast með þróun verðbreytinga.
Þess má geta að nýr rammasamningur hefur einnig tekið gildi um kaup á olíu og eldsneyti f. ökutæki og vélar ríkisins. Þar var einnig samið við N1 og Skeljung.
Allar nánari upplýsingar um þessa samninga eru aðgengilegr fyrir kaupendur á rammavef Ríkiskaupa.
