Fréttalisti
Tilboð opnuð í gegnumlýsingartæki fyrir Tollstjóraembættið
Um 66 milljóna króna munur reyndist á hæsta og lægsta boði
Mikill munur reyndist á hæsta og lægsta tilboði í útboði á gegnumlýsingarbúnaði fyrir gáma sem Ríkiskaup unnu fyrir Tollstjórann í Reykjavík.
Um 66 milljóna króna munur var á hæsta og lægsta tilboði. Þrjú tilboð bárust og hljóðaði hæsta boð upp á um 181 milljón króna en lægsta boð var tæpar 115 milljónir.
Það var kínverskt fyrirtæki, Nuctech Company Ltd., sem átti lægsta boð og Smith og Norland í samvinnu við Smiths Heimann GmbH áttu hæsta boð. Þriðja tilboðið sem hljóðaði upp á um 152 milljónir átti bandarískt fyrirtæki, Rapiscan Systems Ltd.,sem er með útibú í fjölmörgum löndum.
Þegar undirbúningur útboðsins hófst var gert ráð fyrir að markaðsverð á hliðstæðum búnaði væri í kringum 200 milljónir króna, þannig að hér er um gífurlegan sparnað að ræða fyrir íslenska ríkið.
Farið verður vandlega yfir þau tilboð sem bárust og ákvörðun tekin á næstu vikum um hvaða tæki verður fyrir valinu.
