Fréttalisti

Vistvæn innkaup fara eftir eðli og umfangi hverrar stofnunar fyrir sig og því hafa fjármála- og umhverfisráðuneytin farið þá leið við innleiðingu vistvænna innkaupa að halda vinnustofur um leiðir og þau verkfæri sem stofnunum standa til boða s.s. innkaupagreiningu, rammasamninga og grænt bókhald.

Innkaup snúast um val, val á vöru og þjónustu, val á birgjum og þjónustuaðilum og val um aukin eða minnkuð útgjöld. Það er því markmið vinnustofanna að starfsfólk stofnanna átti sig á mikilvægi þess að velja og afleiðingum þessa vals. Áhersla er lögð á létt og skemmtilegt yfirbragð á vinnustofunum og hvatt til þess að samskipti séu gagnkvæm þannig að við lærum sem mest hvert af öðru.

Í tillögunni eru lagðar til 48 leiðir til þess að efla græna hagkerfið hér á landi. Þar á meðal er tillaga þess efnis að allir nýir rammasamningar ríkisins um innkaup, uppfylli viðmið í umhverfisskilyrðum í þeim vöruflokkum þar sem slík skilyrði hafa verið útbúin.

Nýr rammasamningur um starfsmannafatnað tók gildi 28. febrúar 2012.  Í þessum samningi er margvíslegur starfsmannafatnaður s.s. kulda- og regnfatnaður, prjón- og flísfatnaður, ófóðraður vinnufatnaður og öryggisfatnaður, húfur og vettlingar og skófatnaður auk matreiðslufatnaðar og fínni fatnaðar s.s. skyrtur jakkar, buxur, bindi ofl.
Undir þennan samning fellur einnig einkennisfatnaður af ýmsu tagi auk þess sem samið var um tímagjald vegna viðgerða og sérmerkinga.

Ríkiskaup f.h. innanríkisráðuneytisins hafa í samvinnu við norsk yfirvöld tilkynnt niðurstöðu forvals vegna fyrirhugaðra kaupa Landhelgisgæslu Íslands á nýrri leitar- og björgunarþyrlu. Eftirtalin fyrirtæki hafa verið valin og metin hæf sem bjóðendur í lokuðu innkaupaferli: Agusta Westland Ltd., Eurocopter SAS og Sikorsky International Operations Inc.. Fyrirhugað er að kaupa eina  sérstaklega útbúna þyrlu til leitar- og björgunarstarfa fyrir Landhelgisgæsluna, til afhendingar á árinu 2018, með möguleika á að bæta síðar við öðrum tveimur þyrlum.

Ríkiskaup kynna fyrirhuguð útboð rammasamninga á vegum Ríkiskaupa á árinu 2012. Tilgangurinn er meðal annars að kynna áhugasömum birgjum og kaupendum þessi áform með góðum fyrirvara. Samningarnir eru almennt við helstu seljendur á viðkomandi markaði en allir áhugasamir birgjar eru hvattir til að kynna sér samningana og útboðin.

Niðurstöður úttektar á opinberum vefjum voru kynntar á Grand hóteli 18. janúar undir yfirskriftinni: Hvað er spunnið í opinbera vefi 2011? Jafnframt var í fyrsta sinn veitt viðurkenning fyrir bestu vefina. Það er ánægjuefni að vefur Ríkiskaupa var í 10. sæti af vefjum ríkisstofnana með 82 stig af 100 mögulegum.

Framkvæmdasýsla ríkisins, f.h. Innanríkisráðuneytisins býður til opinnar hönnunarsamkeppni (framkvæmdasamkeppni) um byggingu nýs fangelsis á Hólmsheiði í Reykjavík. Um er að ræða nýtt gæsluvarðhalds- og móttökufangelsi með deild fyrir kvenfanga, aðstöðu fyrir  afplánun skemmri fangelsisrefsinga og vararefsinga á Hólmsheiði í Reykjavík. Fangelsisbyggingin verður með 56 fangarýmum og  u.þ.b. 3.700 m² að stærð. Samkeppnin fer fram í samvinnu við Arkitektafélag Íslands.

Skv. upplýsingum frá fjármálaráðuneyti sóttu 17 manns um starf forstjóra Ríkiskaupa, fjórtán karlar og þrjár konur. Fjármálaráðherra hefur skipað Halldór Ó. Sigurðsson til að gegna embætti forstjóra Ríkiskaupa til fimm ára frá 1. janúar 2012. Halldór var áður deildarstjóri innkaupadeildar hjá Landspítala háskólasjúkrahúsi.

Listi með nöfnum umsækjenda í stafrófsröð er birtur á vef Ríkiskaupa.